AZƏRBAYCAN BEYNƏLXALQ BANKININ PULLARI NECƏ YEYİLİB?

Azərbaycanın ən böyük bankının sədri Cahangir Hacıyev milyonlarla dollar vəsaitin oğurlanması ittihamı ilə həbs olunub.

Cahangir Hacıyev və onun həyat yoldaşı Zamirə Hacıyeva çirkli pulların hesabına yaşayıblar. “2003-2015-ci illəri əhatə edən dövrdə Hacıyevlər Böyük Britaniyada böyük sərvət xərcləyiblər, - “Bloomberg” agentliyi uzun məqaləsini bu sözlərlə başlayır. – Onlar Londonun dəbdəbəli Naytsbric rayonunda taunhausa 11,5 milyon funt sterlinq və qolf meydanına, eyni zamanda məşhur Askot ippodromu yaxınlığındakı kluba daha 10,5 milyon funt sterlinq ödəyiblər. Onlar 42,5 milyon dollara yeni “Gulfstream” təyyarəsi alıblar. Bununla yanaşı, 35 ədəd kredit karta sahib olan Zamirə Londonun ən məşhur “Harrods” univermağında pulları sağa-sola xərcləyib. O, təkcə bir həftə ərzində zərgərlik məmulatlarına, dizayner geyimlərinə və başqa məhsullara təxminən 725 min funt sterlinq xərcləyib. Halbuki ərinin 2008-ci ildə Azərbaycan Beynəlxalq Bankında illik əmək haqqı 70650 dollar təşkil edib, özünün isə ciddi gəlir mənbəyi olmayıb”.

Lakin məxariclə mədaxil arasındakı böyük fərqə baxmayaraq, bir sıra vasitəçi – hüquqşünas, mühasib, investisiya konsultantı və başqa mütəxəssislər cütlüyə sərvətini Böyük Britaniyada aktivlərə yatırmağa kömək edib.

 “Bloomberg” agentliyi Azərbaycandan çirkli pulların yuyulmasında Cahangir Hacıyevə kömək edən şirkətlərin adlarını açıqlayıb. Onların arasında fidusiar xidmət göstərən “TridentTrust” və multiailə ofisi adlanan “WernerCapital” şirkətləri olub. “NCA” (Cinayətkarlıqla Mübarizə üzrə Milli Agentlik) məlumat verir ki, bu müəssisələr qolf klub almaq üçün Normand adaları və Böyük Britaniyada hüquqi şəxslərin yaradılmasında kömək ediblər.

Londonda yerləşən “Werner Capital” yüksək risk dərəcəsinə görə banklardan rədd cavabı alan ultrazəngin müştərilərə xidmət göstərən hibrid investisiya şirkətidir. Şirkət “Deutsche Bank AG” və “HSBC Holdings Plc” banklarının keçmiş rəhbəri Tomas Mateos Verner (Tomas Mateos Werner) tərəfindən təsis edilib. “WernerCapital” iqamətgahların alınmasından tutmuş vizaların əldə edilməsi və uşaqların Böyük Britaniyanın ən yaxşı məktəblərinə düzəldilməsinə kimi bir çox məsələdə ailələrə yardım edir. Bu şirkət Zamirə Hacıyevanın işi ilə əlaqədar “NCA”-nın diqqət mərkəzinə düşüb. Çirkli pulların yuyulması ilə ciddi mübarizəyə başlayan agentlik hesab edir ki, London bütün dünyadan qanunsuz yolla əldə edilmiş pulları cəlb edir.

Cahangir Hacıyev 2003-cü ildə Vircin adalarında yerləşən saxta şirkət vasitəsilə 2,5 milyon funt sterlinqə Naytsbricdə ev alıb. Hərçənd həmin vaxt onun əmək haqqı 36 min dollardan az olub.

Hacıyevlərin əldə etdiyi ikinci mülk elit Belqreyviya rayonunda 3,2 milyon funt sterlinq dəyərində mənzil olub. 2006-cı ildə “Harrods” univermağının loyallıq proqramına qoşulan Zamirə Hacıyeva növbəti 90 gün ərzində “Louis Vuitton” və başqa brendlərin məhsullarına 15 min funt sterlinqdən çox pul xərcləyib.

2011-ci ildə “WernerCapital” İsveçrənin “EFGInternational” bank qrupu üçün Cahangir Hacıyevin kapitalı haqqında hesabat hazırlayıb. Həmin sənədə əsasən Hacıyevin aktivləri 72,6 milyon dollar təşkil edib. Bura İsveçrənin “Bordier & Cie” adlı başqa bir bankında saxlanılan 4,5 milyon dollar, həmçinin Azərbaycanda bir neçə iqamətgah və Sardiniyada 15 milyon dollar dəyərində villa daxildir.

Siyahıda həmçinin Londonun cənub-qərbində nüfuzlu Sent-Corcs-Hilldə yerləşən Uorreners adlı 1,5 akrlıq torpaq sahəsi yer alıb. Həmin torpaq sahəsi 3,7 milyon funt sterlinq dəyərində qiymətləndirilib.

2013-cü ildə “WernerCapital” Cahangir Hacıyevə daha mürəkkəb saziş həyata keçirməyə kömək edib. Sabiq bankir Berkşirin yaşıllıq kənd bölgəsində 170 akrlıq sahədə yerləşən “Mill Ride & Country Club” qolf klubunu əldə edib. Hacıyev buna görə 10,5 milyon funt sterlinq ödəyib.

Cahangir Hacıyev 2016-cı ildə həbs edildikdən sonra həyat yoldaşı Zamirə “Christie's” hərrac evi vasitəsilə özünün “Cartier”, “Boucheron” və “Van Cleef & Arpels” kolleksiyasından olan zinət əşyalarını satmağa başlayıb. O, 2016-cı ilin iyun ayınadək 1,5 milyon funt sterlinq toplaya bilib.

2016-cı ilin aprel ayında Böyük Britaniyada qəbul edilən qanuna əsasən ölkədə fəaliyyət göstərən şirkətlər sxemə daxil olan vasitəçi şirkətlərin sayından asılı olmayaraq yekun sahibkarlar haqqında informasiya təqdim etməlidir.

Elə həmin il “MRGC” şirkətinin təqdim etdiyi altı səhifəlik sənəddə qeyd edilib ki, Zamirə Hacıyeva trast vasitəsilə şirkətin ən azı 75%-nə nəzarət edir. Ancaq qanun qüvvəyə minən gün Zamirəni Kiprdə hüquq şirkətinin başçısı Andreas Georgiu adlı bir nəfər əvəzləyib. Zamanla Georgiu nəzarəti qardaşı qızı Yelena Georgiuya ötürəcək.

“Amma Zamirə Hacıyevanı ən çox Azərbaycana ekstradisiya edilə biləcəyi narahat edir. Belə olduğu təqdirdə onu da ərinin aqibəti gözləyəcək. İyunda baş tutan məhkəmə dinləmələrində Azərbaycanın maraqlarını təmsil edən vəkil Hacıyevanın mütəşəkkil cinayətkar qruplaşmanın üzvü olduğunu qeyd edib, onu çirkli pulların yuyulmasında ittiham edib. Zamirə Naytsbricdəki evində məhkəmənin qərarını gözləyir”, - məqalənin sonunda deyilir.

Mənbə: BLOOMBERG

FİKRİNİ BİLDİR